O‘zbekiston Respublikasi Prezidenti huzuridagi Davlat siyosati va boshqaruvi akademiyasida Ilmiy ishlar va xalqaro aloqalar bo‘yicha prorektor Raima Hakimovna Shirinovaning akademiya doktorant va tayanch doktorantlari bilan ochiq muloqoti bo‘lib o‘tdi.

Tadqiqotchilar tomonidan xalqaro va mahalliy ilmiy konferensiyalarda faol ishtirok etish, qisqa muddatli ilmiy amaliyotlarni yo‘lga qo‘yish, nufuzli xalqaro nashrlarda maqolalar e’lon qilish, shuningdek, jahon reytinglariga kirgan oliy ta’lim muassasalari bilan ilmiy hamkorlikni kengaytirish masalalari ilgari surildi.

Prorektor Raima Shirinova mazkur yo‘nalishlar bo‘yicha aniq va tizimli yo‘l xaritasini taqdim etib, xalqaro grant va loyihalarda ishtirok etish, ilmiy tahlilga asoslangan nashrlar bilan barqaror aloqalarni yo‘lga qo‘yish bo‘yicha Akademiya tomonidan amaliy qo‘llab-quvvatlash mexanizmlari joriy etilishini ma’lum qildi.

Xususan, tadqiqotchilar uchun xalqaro ilmiy jurnallar bilan ishlash ko‘nikmalarini rivojlantirish maqsadida SCImago Journal Rank (SJR) xalqaro analitik platformasidan foydalanish bo‘yicha maxsus amaliy taqdimot o‘tkazilishi belgilandi. Ushbu taqdimot izlanuvchilarga jurnallarning reyting ko‘rsatkichlarini to‘g‘ri tahlil qilish, maqolalarni joylashtirish strategiyasini belgilash hamda xalqaro ilmiy talablariga mos yo‘nalishni tanlash imkonini beradi.

Shuningdek, ilmiy yo‘nalishlar kesimida tajriba almashishga qaratilgan mustaqil speaking clublar tashkil etish, yetuk olimlar ishtirokida ochiq davra suhbatlarini yo‘lga qo‘yish ilmiy natijadorlikni oshirishning samarali vositalari sifatida qayd etildi.

“Bugungi kunda ilmiy muloqot tili chegara bilmaydi, shuning uchun siz chet tilidagi nufuzli jurnallarda maqolalar chop eta olishingiz va ayniqsa, o‘z sohangiz bo‘yicha xalqaro munozaralarda ishtirok etishingiz kerak. Til to‘siqlarini yengib o‘tishingiz va xato qilishdan qo‘rqmasligingiz juda muhim. Akademiya ilmiy xodimlarining ilmiy ishlari va ilmiy yangiliklarini xalqaro miqyosda e’tirof etish biz uchun strategik maqsaddir. Bu yo‘lda o‘z tajribam va tavsiyalarimni o‘rtoqlashishga tayyorman”, — dedi prorektor.

Mazkur ochiq muloqot Akademiyada ilm-fanni global standartlar asosida rivojlantirish, tadqiqotchilarni xalqaro ilmiy makonga olib chiqish hamda akademik muhitni sifat jihatidan yangilashga qaratilgan yangi bosqich boshlanganini yaqqol namoyon etdi.